Met reën wat vroegoggend sag oor Parys geval het, was dit die ene bedrywigheid in die kerksaal van die NG gemeente Parys-Suid.

Hier is geloop, gekoop en geëet want ‘n kerkbasaar in die platteland kan jy nou eenmaal nie mis nie. Van basaarpoeding tot kerrie-en-rys en ‘n lekker poeding mix kry jy hier, en tussendeur die kuier want dis mos eintlik waaroor basaar gaan. En as die koffie boonop op die huis is, dan bly jy sommer langer.

Maar vra dié wat weet – as dit basaar is, slaap jy nie laat nie, want die lekkernye verkoop vinniger as wat pannekoek deur die lug kan vlieg in die omdraaislag.