Polisie slaan toe op multi-miljoen dwelmvervaardigingslaboratorium
Die ondersoek na die inhegtenisname van die 11 verdagtes duur voort.
Elf mense onder wie vier Mexikaanse burgers en ‘n vrou, is in hegtenis geneem nadat die polisie vandag op ‘n multi-miljoen rand dwelmvervaardigingslaboratorium op ‘n plaas in Swartruggens toegeslaan het.
Die intelligensiegedrewe operasie is uitgevoer deur die Nasionale Hoofkantoor se Misdaadintelligensie, die Nasionale Hoofkantoor se Ondersoeke na Georganiseerde Misdaad en ’n nasionale span van die DPCI.
Dit volg nadat die polisie net verlede week alleen 280 verdagtes vir dwelmhandel gearresteer het, en nog 2 573 verdagtes vir die besit van dwelms tydens operasies wat regoor die land uitgevoer is, het brigadier Athlenda Mathe gesê.
Die Waarnemende Nasionale Kommissaris van die polisie, luitenant-generaal Puleng Dimpane, het polisielede geloof vir hul volgehoue toewyding om georganiseerde misdaadsindikate wat betrokke is by die vervaardiging en verspreiding van dwelms, te ontmasker.
Sy sê die jongste dwelmvonds moet ’n streng waarskuwing aan misdadigers stuur dat die Suid-Afrikaanse Polisiediens vasberade en meedoënloos bly in die stryd teen misdaad.
.
