Die Vrystaat se werkloosheidsyfer van 37,8% is die tweede hoogste in Suid-Afrika ná die Oos-Kaap. Dit is volgens die Kwartaalikse Arbeidsmagopname (QLFS) vir die eerste kwartaal van 2026 wat vandag deur Statistieke Suid-Afrika (StatsSA) bekend gemaak is.

Die jongste statistiek toon dat minstens 11 000 meer mense slegs in die eerste kwartaal van vanjaar by die syfer gevoeg is.

In ’n tyd waarin lewenskoste steeds skerp styg, tesame met toenemende brandstofprysverhogings oor die afgelope twee maande, sal die las die swaarste deur die werklose bevolking gevoel word.

As die land se sentrale provinsie behoort die Vrystaat egter ’n ekonomiese spilpunt te wees met ’n florerende ekonomie en volop werksgeleenthede, meen die DA.

In plaas daarvan gaan die provinsiale regering voort om kritieke ekonomiese bates soos paaie, grootmaatdiensinfrastruktuur en ontspanningsfasiliteite, insluitend wildreservate en museums, te verwaarloos — alles met die potensiaal om beleggings te lok, toerisme te stimuleer en volhoubare werksgeleenthede te skep, het die DA in reaksie op die bekendmaking van die statistiek gesê.

Die party sê verder die skerp afname in die konstruksiesektor, wat ongeveer 18 000 werksverliese aangeteken het, is verdere bewys dat die regering versuim om betekenisvol in infrastruktuurontwikkeling te belê.