Maak seker jy is die naweek by Parys se AfriDome vir ‘n fees van musiek
Twaalf kunstenaars sal vandag op die feesverhoog wees. Maak seker jy loop dit nie mis nie.
”n Fees van musiek wag die naweek op Parysenaars en besoekers by die AfriDome. Die fees val saam met die dorp se 150-jaar-feesviering en bied ‘n propvol program met iets vir elke smaak.
Die fees het reeds Vrydagaand afgeskop met voete-stamp-ritmes van tradisionele boeremusiek deur die Kroonwild-orkes.
Vandag, Saterdag 30 Mei, sal die feesverhoog skud met 12 topkunstenaars, waaronder Karlien Husselman, Anthony McGee, André van der Rheede, Wilmari, Rick Charrit, LJ Upington se Kind, Etha, Garner Nel, Leroi Heunis, Nico Booijse en Amor Vittone.
Vir diegene wat die naweek op ‘n rustiger noot wil afsluit, is daar Sondag 31 Mei se gospel- en country-vertonings. Gospelsangers wat gehoor kan word, sluit in Reinier, Jeanri, Nico Booijse en Chris Coetzer. By die country-fees kan Suzette Jacobs, Landee, John Morland, Anne-Marié en Cecilia Jane gehoor word.
Hoogtepunte
Buiten die musiek is daar hope opwinding vir die hele gesin. Vanjaar se hoogtepunte is die Mnr. en Mej. AfriDome-kroning en ‘n sangkompetisie met die wenner wat die ongelooflike geleentheid kry vir ‘n opname van een liedjie, ‘n musiekvideo en ‘n jaar se bestuur en bemarking. Besoekers kan ook uitsien na talle ander verrassingspryse en kompetisies wat deur die loop van die drie dae aangebied word.
Saterdagaand om 20:00 sal een gelukkige feesganger wegstap met ‘n R2 000 kontantprys, en al wat jy moet doen om ‘n kans te staan om te wen, is om teenwoordig te wees met die trekking.
Met heerlike kosstalletjies en unieke uitstallers beloof dit om ‘n naweek vir die boeke te wees. Meer as 80 uitstallers en hope kindervermaak, waaronder springkastele, ‘n meganiese bul vir oud en jonk, gesigverf, ponieritte, ‘n petting zoo en vele meer, wag op feesgangers.
Kaartjies is reeds by Computicket beskikbaar.
Navrae
Vir navrae skakel 066 489 3242.
Deel die warmte
Die gemeenskap word aangemoedig om ook deel te neem aan die spesiale winter-hulpprojek om Vrystaat Versorging in Aksie (VVA) te ondersteun. Feesgangers word gevra om asseblief komberse (nuut of gebruik), blikkieskos of nie-bederfbare voedsel saam te bring. ‘n Aflaaipunt sal by die verhoog wees.
