‘n Dagga-laboratorium met ‘n geskatte straatwaarde van R10 miljoen, ‘n selfgemaakte vuurwapen en selfgemaakte ploftoestelle (bomme) is by ‘n kleinhoewe in Vyfhoek, Potchefstroom ontdek.

Kolonel Amanda Funani, polisiewoordvoerder, sê die polisie se dwelmeenheid het ‘n lasbrief om die perseel te deursoek op 14 November bekom en uitgevoer.

“Die span het die kleinhoewe deursoek en het twee gewere (een selfgemaak), ammunisie en drie selfgemaakte ploftoestelle (twee handgranate en een klein pypbom) gevind. Verder het die polisie ‘n hidroponiese dagga-laboratorium met dagga- en daggaplante met ‘n geraamde straatwaarde van R10 miljoen ontdek.”

Michael Cilliers (29) is in hegtenis geneem en het Dinsdag 19 November in die Potchefstroom-landdroshof op aanklag van onwettige optrede, die besit van ‘n vuurwapen en plofstof asook die kweek en handel in dagga verskyn.

Hy sal in aanhouding bly tot sy volgende hofverskyning op Woensdag 4 Desember.