Michael Cilliers (29), wat daarvan verdink word dat hy ’n dagga-laboratorium met plante en dagga ter waarde van ’n geraamde R10 miljoen bedryf het, is Vrydag 29 November op borgtog van R20 000 vrygelaat.

Volgens die polisie moet ballistiese toetse nog op die vuurwapens wat in beslaggeneem is, gedoen word.

Die Herald het vroër berig ‘n dagga-laboratorium met ‘n geskatte straatwaarde van R10 miljoen, ‘n selfgemaakte vuurwapen en selfgemaakte ploftoestelle (bomme) is by ‘n kleinhoewe in Vyfhoek, Potchefstroom ontdek.

Kolonel Amanda Funani, polisiewoordvoerder, het gesê die polisie se dwelmeenheid het ‘n lasbrief om die perseel te deursoek op 14 November bekom en uitgevoer.

“Die span het die kleinhoewe deursoek en het twee gewere (een selfgemaak), ammunisie en drie selfgemaakte ploftoestelle (twee handgranate en een klein pypbom) gevind. Verder het die polisie ‘n hidroponiese dagga-laboratorium met dagga- en daggaplante met ‘n geraamde straatwaarde van R10 miljoen ontdek.”

Cilliers is in hegtenis geneem en het Dinsdag 19 November in die Potchefstroom-landdroshof op aanklag van onwettige optrede, die besit van ‘n vuurwapen en plofstof asook die kweek en handel in dagga verskyn waarna hy in aanhouding gebly het.

Cilliers moet weer 25 Maart 2025 in die hof verskyn.