Die bosse by Potchefstroom se begraafplaas staan amper net so hoog soos die grafte. Die toestand van die begraafplaas laat inwoners ongemaklik en onveilig voel om hulle geliefdes se grafte te besoek.

Wilma Volschenk, ‘n inwoner van Potchefstroom, wat elke week sowat 35 grafte daar moet gaan skoonmaak, sê dit is baie onveilig en ‘n skande dat die plek so lyk.

“Daar loop soms net een man rond met ‘n onkruidvreter. Dit maak feitlik geen verskil nie. Ek vermoed die munisipaliteit wag dat die bosse droog word sodat hulle dit net weer kan brand.”

Navraag oor die toestand van die begraafplaas is by die plaaslike munisipaliteit gedoen.

Jeanette Tshite, munisipale woordvoerder, sê die munisipaliteit is net in hierdie stadium besig en sal so spoedig moontlik aandag aan die probleem gee.