Niemand was diens geweier nie verduidelik munisipaliteit
Volgens Anneke was dit nie die eerste bejaarde wat weggewys is terwyl sy daar gestaan het nie.
Die JB Marks munisipaliteit ontken dat enigiemand diens by die Potchefstroom lisensiekantore geweier is.
Dit nadat ‘n video op sosiale media gedeel is waar ‘n beampte by die Potchefstroom verkeersdepartement op 30 September glo geweier het om ‘n pensionaris te help nadat hy soos almal in die ry gestaan en wag het.
Jeanette Tshite, munisipalewoordvoerder, sê die betrokke bejaarde man is nie diens geweier nie.
“Die voorval het ontstaan uit ‘n misverstand rakende die toustaanstelsel by die Lisensiëringsafdeling. Ons Lisensiëringsafdeling het ‘n aangewese tou vir senior burgers, waar stoele voorsien word om te verseker dat hulle nie vir lang tye staan nie. Die bejaardes in die video is na die spesifieke aangewese tou verwys. Ongelukkig het die video wat versprei is, ‘n misleidende indruk of verdraaide weergawe gegee dat ‘n diens geweier is, wat nie die geval was nie.”
Jeanette gaan voort om te sê om verder doeltreffende diens te verseker, word kassiere van ander afdelings aangewys om te help wanneer senior burgers se tou lank word om die proses te bespoedig.
“Die munisipaliteit bly daartoe verbind om alle inwoners, veral bejaardes, met waardigheid en respek te behandel.”
Die video is deur Anneke Pretorius geneem en op sosiale media geplaas. Sy het daardie dag self in die ry gestaan en wag.
Kyk na die video hier:
