Twee verdagtes is in hegtenis geneem nadat hulle ’n volstruis geslag het. Hulle is betrap toe hulle besig was om die vleis te verpak om dit weg te dra.

’n Reaksiegroep van CB Sekuriteit is Sondagaand omstreeks 19:00 na Bert’s Bricks ontbied.
Die reaksiegroep is deur ’n toesighouer na die volstruiskamp geneem waar hulle die verdagtes, wat vermoedelik onder die invloed was, aangetref het wat besig was om die vleis weg te dra.
Een van die verdagtes is in hegtenis geneem, terwyl die tweede in die rigting van die N12 gevlug het. Hy is later naby die N12 in hegtenis geneem. CB Sekuriteit het die verdagtes aan die polisie oorhandig.
Die verdagte wat weggehardloop het is in die jaagtog beseer en hy is per ambulans hospitaal toe geneem vir behandeling. ’n Saak van veediefstal word deur die polisie ondersoek.