Die kantoor van die burgemeester skuld Mike’s Kitchen in Potchefstroom glo R60 000.

Dit het aan die lig gekom nadat eienaar John van der Westhuizen op die Facebook groep Hello Pietie gekla het.

Victor Boqo, woordvoerder van die burgemeester, het bevestig dat daar ‘n agterstallige rekening van ongeveer R60 000 is.

“Hierdie bedrag is nie alles op een slag gebruik nie. Dit is al van Januarie af wat gaste van die burgemeester na die restaurant geneem word,” het hy gesê.

Volgens Boqo, is die rede vir die ageterstallige rekening, die feit dat die aanpassingsbegroting eers laat (28 Mei) deur die raad goedgekeur is.

“Daar is baie diensverskaffers wat nog nie betaal is oor die rede nie. Ons finansies afdeling is hard aan die werk om alle diensverskaffers te betaal. Ons vra dat almal asseblief geduldig is omdat daar regtig ‘n agterstand is,” het Boqo gesê.

Volgens hom was daar ‘n verdere vertraging met Van der Westhuizen se betaling omdat sy belastingklaringsertifikaat nie in orde was nie.

“Dit is snaaks dat hy op Facebook en in die media kla dat ons hom verskuldig is.  Die munisipaliteit ondersteun al lank sy besigheid.  Tlokwe Munisipaliteit  ondersteuning al baie lank van ons plaaslike sakelui insluitend restaurante soos Mikes Kitchen. Dit is nie die enigste restaurant wat die kantoor van die burgemeester gebruik wanneer hy gasheer moet wees vir sy belangrike gaste nie,” het hy gesê.