Die polisie ondersoek ‘n voorval waar ‘n man deur ‘n trein doodgery is in wat lyk na ‘n selfmoord-geval.

Die man is gisteraand (6 Junie) omstreeks 19:00 deur die trein raakgery. 

Volgens ao Mpho Manyoba, polisiewoordvoerder, het ‘n man wat nog nie geidentifiseer is nie, op die treinspoor naby die nywerheidsgebied geloop. 

“Volgens die treindrywer het hy die man gesien en die trein se toeter geblaas om die man te waarsku,” het Manyoba gesê. 

Die man het glo sy baadjie oor sy kop getrek waarna hy op die treinspoor gaan kniel het. Die trein kon nie vinnig genoeg stop nie. Paramedici het die man op die toneel dood verklaar. 

Volgens Manyoba was dit ‘n swart man wat  bruin enkelhoogte stewels aangehad het en met ‘n roomkleurige baadjie.