Woensdagoggend is die Team up-Clean up-projek op die Bult bekendgestel.
Besigheidseienaars op die Bult het bymekaar gekom om die Bult skoon en veilig te maak. In samewerking met die stadsraad het die eienaars van Club MVG, die Akker, Ocean Basket, Butler prokureurs en Varsity Cafe koppe bymekaar gesit om die gemors skoon te kry. So is lewe in dié projek ingeblaas.

Werkers is deur die onderskeie maatskappye in diens geneem om die gebied op die Bult skoon te hou. Terselfdertyd pas hulle sommer mense se karre op. Volgens Santi Britz, wyksraadslid, is die groep se primêre doel om skoon te maak. “Die stadsraad gaan vir ons plante gee wat ons sal skenk, so die werkers sal binnekort ook tuinmaak,” sê Britz. Die plante sal op Cachetpark tussen Esselen- en Borchardstraat geplant word. Vir die projek om suksesvol voort te gaan, word daar ’n beroep op lede van die gemeenskap gedoen om die skoonmakers te ondersteun. In plaas daarvan om geld aan die sogenaamde karwagte op die Bult te gee, word mense gevra om dié fooitjies vir die skoonmakers te gee. “Hulle is baie sigbaar, hulle dra geel oorpakke en elkeen het ’n naamplaatjie met een van die besighede se naam op,” het Britz gesê.

Omdat baie van die besighede kliënte is van Mooirivier Beskerming, het hulle ingestem om as sekuriteit vir die werkers op te tree. Veral aan die begin wanneer daar moontlik groeipyne kan wees tussen die ou karwagte en die nuwe skoonmakers. Mettertyd word daar beplan om ’n nagskof ook op die been te bring sodat die groep werkers permanent op die Bult kan besig wees. Besighede wat tot laat oop is soos Club MVG, sal verantwoordelik wees vir die nagskof. “Die groot boodskap is dat die publiek die projek moet ondersteun deur fooitjies te gee vir die geel oorpak werkers en niemand anders nie.” het Britz gesê.