Mnr. David Richardson (40), wat op 25 Junie ernstig in ’n motorongeluk op die Viljoenskroonpad beseer is, se toestand het so verbeter dat hy Woensdagoggend uit die hoësorgeenheid na ‘n ander saal oorgeplaas is.
Richardson is na die ongeluk per helikopter na die Netcare Milpark-hospitaal in Johannesburg geneem. Hy moes glo ’n plaat in sy elmboog kry, sy heup het ’n fraktuur en hy het verskeie kopbeserings opgedoen.
Volgens sy vrou, Jo-Adrie, het die hospitaal die sedasie gestaak, maar hy is steeds baie deurmekaar.
“Hy het onthou dat hy in ’n ongeluk was, maar dit is al. Hy wil net opstaan en werk toe gaan. Sy been is steeds in traksie en ons wag nou vir die ortopeed om te besluit wat hy met die fraktuur in die heup gaan doen en wanneer,” sê Jo-Adrie.
Hoewel sy besef haar man het nog ’n lang herstelproses wat voorlê, is sy baie dankbaar dat hy vir haar en haar twee kinders gespaar is.
“Die meeste administratiewe dinge soos die versekering is darem afgehandel. Omdat dit elke dag beter gaan met hom, is dit vir die familie emosioneel ook meer draaglik. Ek mis net my koffie in die bed elke oggend,” spot sy.
Jo-Adrie vertel dat haar seun Vihan Dinsdagaand vir haar ’n roos uit die tuin gaan pluk het en op haar kussing vir haar gelos het.
“Hy is net soos sy pa ’n stiller outjie, maar wys sy omgee op sulke klein spesiale maniertjies. Dit het my en die tweeling (Vihan en Miricia) baie nader aan mekaar gebring. Hulle help my regtig baie in die tyd,” vertel sy.
