Cectronics Security Systems (CSS) het Dinsdag ‘n verskil gemaak in die lewens van ‘n gesin in Promosa wie se huis onlangs afgebrand het.
Die Herald het onlangs in Midweek Herald berig oor ‘n woning wat afgebrand het toe die gesin se koolstoof vlamgevat het. Die gesin, Vusi Shozi, sy vrou Bongiwe, hul dogter Amanda Xhi en haar twee kinders het alles wat hulle besit het, in die brand verloor. Hulle word boonop nou gedagvaar vir R4 500 omdat ‘n ander gesin wat ook daar gewoon het, hul besittings in dieselfde brand verloor het.
Deo Kotze van CSS het dadelik toe sy die berig gelees het, besluit dat dit ‘n projek is wat hulle moet aanpak. Hulle het goedere ingesamel en Dinsdag kon hulle swartsakke vol komberse, klere, toiletware en droë kos aan die gesin oorhandig.
“Ek het myself in daardie mense se skoene geplaas en besef hoe dit moet voel om alles te verloor,” sê Deo. Die gesin woon tans by vriende en gaan nog baie hulp benodig om hul lewens weer te herbou. CSS hoop dat hulle skenking die res van die gemeenskap sal aanmoedig om ook uit te reik na die gesin.

“Hier gaan dit nie oor geld of besigheid nie, dit gaan daaroor om ‘n verskil te probeer maak in iemand anders se lewe. Ons moet saamstaan as ‘n gemeenskap en hierdie mense probeer help,” sê sy. Hoewel CSS se skenking ‘n groot verskil maak, het die gesin steeds hulp nodig.
Vir enige skenkings en donasies kan die Herald by (018) 293 0750 geskakel word.