Ses mense is Saterdag (8 Oktober)  omstreeks 13:00 in hegtenis geneem nadat hulle glo ongeveer R10 000 se klere by ’n inkopiesentrum gesteel het.
Volgens ao. Mpho Manyoba, polisiewoordvoerder, het karwagte by die Mooirivier Mall ’n persoon gesien wat groot hoeveelhede klere in ’n kattebak laai. Die klere was nog aan hangers.

Sers. Seleka, wat in die gebied gepatrolleer het, is deur die karwagte voorgekeer en hulle het dit aan hom gerapporteer. Seleka het die verdagte in die parkeerarea gesien en tot by die voertuig gevolg. ’n Hoop klere is in die voertuig gevind en die verdagte kon nie bewys lewer dat hy die klere gekoop het nie. Seleka het die verdagte daarna in hegtenis geneem op aanklag van die besit van vermeende gesteelde goedere.
Inligting is van die verdagte gekry, waarna nog vyf verdagtes, wat na bewering ook by die diefstal betrokke was, in hegtenis geneem is. Volgens Manyoba is drie mans en drie vroue in hegtenis geneem. Die verdagtes is blykbaar van Eldoradopark.