Twee ongelukke wat gistermiddag (1 Junie) plaasgevind het, het een persoon beseer gelaat en ‘n ander voertuig op sy dak laat beland.

Paramedici van ER24 het by beide tonele opgedaag.

Die eerste ongeluk wat omstreeks 15:00 op die hoek van Albert Luthuli- en Walter Sisulustraat plaasgevind het, het twee voertuie met mekaar gebots. Die presiese oorsaak van die ongeluk is onbekend. Verkeer in Albert Luthulistraat was erg geaffekteer deur die botsing.

Een persoon is met ligte beserings hospitaal toe geneem.

Die tweede ongeluk het omstreeks 17:00 op die hoek van Du Plooy- en Sol Plaaitjiestraat plaasgevind waar ‘n voertuig op sy dak beland het. Die muur van ‘n huis in Du Plooystraat is beskadig tydens die voorval. Drie voertuie was betrokke in die ongeluk maar gelukkig is  niemand beseer nie.

Die pad was gesluit terwyl owerhede dit skoon gemaak het.