Asjassies Pre-Primêre Skool het einde Mei weer hulle jaarlikse Sportdag gehou en met al die lekker aktiwiteite en pryse wat op die spel was, was dit ‘n reuse sukses. Dit word gekenmerk as die hoogtepunt by Asjassies en al die  kleuters het hulself baie geniet.

Blue Ribbon Bakkery het gesorg vir ‘n feestelike atmosfeer met hulle groot sigbare blou trok wat klank en musiek vir die dag verskaf het. Daar was ook verskeie kosstalletjies vir die honger magies en allerlei kleuteraktiwiteite.

Die dag het met ‘n optog verby die pawiljoene afgeskop, waarna lekker atletiekresies gehardloop is en elke maatjie ‘n pragtige medalje ontvang het. Tientalle ouers het ook deelgeneem aan die ouerwedlope – selfs die oumas het hul eie resies gehad.

Boonop was daar ook ‘n gelukkige trekking waar vier kleuters van Asjassies PP en vier kleuters van Asjassies Witrand fietsies gewen het. Asjassies bedank Blue Ribbon Bakkery, Uncle Arthur’s Engen Garage, asook die Kinderkinetika student van die Noordwes-Universiteit onder leiding van dr. Barry van Rensburg vir vier hindernisbane wat sommer groot pret verskaf het.

“Dankie aan elkeen wat die dag teenwoordig was en bygedra het tot nog ‘n onvergeetlike Sportdag,” het Adri Eckard, skoofhoof van Asjassies gesê.