Aardklop-feesgangers se oë het gerek toe daar Dinsdagmiddag omstreeks 18:00 ’n swart rookwolk oor die terrein gehang het.

Dit was die gevolg van ’n hoop ou bande wat by die weermagbasis aan die brand geraak het. Die basis is beveilig en die brandweer is ontbied, wat die brand binne ’n uur onder beheer gebring het. Hulle kon keer dat dit na omliggende geboue versprei. Daar word vermoed dat die brand deur ’n veldbrand veroorsaak is. Met die Herald se aankoms op die toneel was die veld in die gebied swart gebrand en dit het op sekere plekke nog gerook. Die militêre polisie het die Herald van die toneel verjaag.