Rowers het ’n vrou tydens ’n rooftog in Bailliepark aangerand.
Volgens ao. Mpho Manyoba, polisiewoordvoerder, is die vrou en haar kêrel deur drie mans in hulle woonstel in Inyangastraat wakker gemaak.
“Een van die verdagtes het die man uit die bed gesleep terwyl die ander hom met ’n vuurwapen gedreig het,” het Manyoba gesê.
Die mans het die man en vrou met skoenveters vasgemaak en komberse oor hulle koppe gegooi.
Volgens Botes Botha van CB Sekuriteit is hulle deur bure geskakel oor ’n vrou wat om hulp geskree het.
Hulle het die polisie in kennis gestel en na die toneel gejaag, waar hulle bevestig het dat by die woonstel ingebreek is.
Met hul aankoms was die vrou reeds op pad hospitaal toe.
Volgens Manyoba het die rowers met ’n voertuig en verskeie elektroniese toestelle gevlug.
Die voertuig is later verlate naby Vereeniging gevind.