Die blitspatrollie in Potchefstroom het Woensdag (27 Februarie)  ʼn 32-jarige man  vir die besit en handel in dwelms in hegtenis geneem.

Volgens kapt. Aafje Bothma, provinsiale polisiewoordvoerder, het die man ongeveer 2000 mandrax -tablette in sy besit gehad. Die waarde van die tablette word op R600 000 bereken.

Volgens Bothma was die polisie besig om in die stad te patrolleer waarna hulle omstreeks 11:00 ʼn verdagte voertuig in die parkeerterrein van ʼn winkelkompleks naby die N12 gesien het.

“Die bestuurder van die voertuig het na bewering probeer vlug nadat die polisie die voertuig genader het,” het Bothma gesê.

In die voertuig het polisiebeamptes ʼn tas wat met kleefband toe gedraai is, gevind. Binne die tas was daar ongeveer 20 plastieksakke wat die dwelms bevat het. As deel van die ondersoek het die polisie op die verdagte se voertuig beslag gelê. Die verdagte sal na verwagting vandag(1 Maart) in die Potchefstroomse Landdroshof verskyn.