‘n Rower het homself Maandagoggend misgis toe hy dink dat hy ‘n matriekseun van Volkies van sy selfoon gaan beroof.

Volgens die seun se pa, was sy seun op pad skool toe.

“Hy het kortpad gevat oor die treinspoor waar die man hom voorgekeer het,” vertel die pa. Volgens hom het die verdagte die seun se fiets vas gegryp waarna hy sy selfoon geëis het terwyl hy hom met ‘n mes gedreig het. Die matriekseun het sy man gestaan waarna ‘n bakleiery ontstaan het.

“Hy het hom ‘n paar goeie houe gegee,” vertel die seun se pa.

Tydens die bakleiery het die verdagte die seun gebyt en met ‘n mes gesteek. Volgens sy pa het dit gelukkig nie sy long deurboor nie. Die verdagte het gevlug sonder die selfoon wat hy wou roof. Die seun het sy pa gebel waarna hy hospitaal toe is. Hy is oornag in die hospitaal gehou en het Dinsdagmiddag weer huis toe gegaan. Die seun is vandag (17 April) weer terug by die skool.

Lees meer in volgende week (25 April) se Herald