Twee lyke op een dag by polisie gerapporteer

‘n Verbyganger het Vrydag, 10 Julie op die lyk van ‘n man in ‘n stroompie tussen die riete langs die Promosa-pad afgekom en dit dadelik aan die polisie gerapporteer.

Volgens kapt. Aafje Botma was dit die liggaam van Lebogang Donald Huna (29). In ‘n ander voorval dieselfde dag, is ‘n lyk naby Kynoch gevind.

Volgens kapt. Botma was dit vermoedelik die liggaam van ‘n hawelose man wat al voorheen op die perseel opgemerk is. Die polisie het die man nog nie geïdentifiseer nie en skat sy ouderdom as 32 jaar.

Geregtelike doodsondersoeke sal deur die polisie gedoen word. Kapt. Botma het egter bevestig dat daar voorlopig geen vuilspel vir enige van die oorledenes se dood vermoed word nie.