‘n Jong vrou is hospitaal toe geneem nadat die voertuig waarin sy ‘n insittende was teen ‘n boom gebots het. Volgens Christiaan Haefele, bedryfsbestuurder van Mooirivier Beskerming, het hulle die ongeluk op die kringtelevisie beeldmateriaal gesien, waarna reaksie en mediese hulp na die toneel ontbied is.

Dit blyk dat die bestuurder  omstreeks 22:00, Donderdagaand (17 Junie) beheer van die voertuig verloor het waarna dit  ‘n boom getref en omgekeer het. ER24 het aan die voertuig gesny om haar uit te kry waarna sy na Mediclinic Potchefstroom vir verdere behandeling geneem is.

Volgens Diana King, woordvoerder van Mediclinic Potchefstroom, is die 18-jarige vrou tans in ‘n stabiele toestand. Sy word vir ‘n heup besering behandel. 

Die presiese oorsaak van die ongeluk is nog onbekend, maar die polisie was ook op die toneel om verdere ondersoek in te stel.