Potchefstroom Girls High, Hoërskool Ferdinand Postma, Regorogile en Ventersdorp Sekonder is die enigste skole in die J.B Marks sub-distrik met ‘n 100 persent slaagsyfer. Potchefstroom Gimnasium (99.3%) BA Seobi (98.9%), Volkskool Potchefstroom (96.1%) en Potchefstroom Boys High (90%) behaal die volgende beste slaagsyfers.
Altesaam behaal die J.B Marks sub-distrik ‘n algehele slaagsyfer van 84.33 persent. Matrieks kon vanoggend (Vrydag, 21 Januarie) uiteindelik hulle matriekuitslae by hul skole kry.
Vreugdesvure het hoog gebrand veral vir leerders wat met talle onderskeidings spog. Gimmies se uitstaande leerders is Michelle le Roux met 9 onderskeidings, Jaqueline van Rooyen (8) en Michael van Rooyen haar tweelingboetie ook met 8.
Volkies se top presteerder is Renken Meiring met 8A’s. Willis Viljoen en Mardi Swart behaal albei 7 onderskeidings.
Ferdies se slimkoppe, Tshegofatso Takang en Francois Pieterse behaal ‘n uitstekende 8 onderskeidings. Die top presteerder by Girls High is Marle Siebert met 7 onderskeidings.
