‘n Kunsuitstalling met die tema, Fabric of society het verlede Woensdag (19 Januarie) by die Snowflake-gebou geopen. Dit is ʼn viering van 11 kunsstudente se harde werk gedurende die Covid-19-inperking.

Dié studente, wat almal kunslesse by die kunstenaar, Jody Olën neem, wys met dié uitstalling dat hulle beslis nie kreatief ingeperk was nie. Die uitstalling is ʼn fees vir die oog met die dekoratiewe, tegnies vernuftige werke. Die humoristiese aanslag in sommige werke laat jou lagspiere prikkel en weer die ligter kant van ons samelewing raaksien. Dit is beslis kunstenaars soos dié wat ʼn groot bydrae maak tot die ‘fabric of our society’ midde die angstige, ingeperkte tydperk waarin ons onsself bevind.

Diegene wat graag kwaliteit kuns teen bekostigbare pryse wil aanskaf, mag nie die uitstalling mis nie. Galery-ure is van Maandag tot Vrydag van 7:00 – 19:00 en Saterdae van 9:00 tot 19:00. Die uitstalling duur tot 26 Februarie. Die uitstalling word aangebied in samewerking met die Potchefstroom Kunsvereniging. Vir navrae, stuur ʼn epos na potchkuns@gmail.com.