‘n Span van vyf mans beoog om in Augustus vanjaar vanaf Klerksdorp al die pad na Oos-Londen in die Oos-Kaap te stap, waar vanjaar se Mighty Men Konferensie in September vanaf 23-25 September aangebied sal word. Die roete is ongeveer 1040 km en sal strek oor ongeveer 33 dae.

As deel van hierdie staproete het die mans ‘n draai by Huis Hebron op Saterdag, 30 Julie gemaak. Inwoners van Huis Hebron het die Kruislopers tegemoet gekom langs die pad. Hulle is ook ingewag by die ingang na Huis Hebron toe om die laaste paar honderd meter saam met die Kruislopers te stap tot by die Kerkgebou op Hebron.

Die Kruislopers het Hebron se inwoners bedien met hulle getuienenisse, salwing en sang tydens hulle besoek. Gretha le Roux, Stigterslid van Huis Hebron, het die Kruislopers seën en beskerming op hulle reis toegebid.

Die vyf mans, Herman Blom, Armando Roussado, Johan van der Westhuizen, Fanie Turner en Renier Cronje sal beurte maak om ‘n groot Kruis op hul reis te dra om die Evangelie van Jesus te verkondig (Markus 16:15) in te tree vir die land en ook te bid vir reën waar dit broodnodig is. Die Kruislopers het ook verskeie afsprake by tronke, kerke en skole as deel van hulle roete om samehorigheid en omgee in gemeenskappe te bevorder te same met die verkondiging van die Evangelie.