Wat vir baie mense na ’n bykans onmoontlike uitdaging klink, is vir Dirk Anton Pretorius ’n manier om ’n verskil te maak in die lewens van diere in nood.

Dirk het vanoggend (6 November) om 07:00 by Music Café in Potchefstroom weggespring met ’n besonderse uitdaging voor hom, om ’n afstand van 145 km vanaf Potchefstroom tot in Rustenburg te hardloop.

Die uitdaging word aangepak ten bate van die Dierebeskermingsvereniging (DBV/SPCA), met die doel om bewustheid te skep en ondersteuning te werf vir diere wat op mense se hulp en beskerming aangewese is.

Dit is nie bloot ’n toets van fisieke uithouvermoë nie, maar ook ’n bewys van wat ’n mens kan bereik wanneer jy jou passie en deursettingsvermoë vir ’n groter doelwit aanwend.

Ondersteuners en belangstellendes wat Dirk se merkwaardige reis wil volg, kan by die WhatsApp-groep aansluit om op hoogte te bly van sy vordering.

Sluit hier aan: https://chat.whatsapp.com/HFVcfwvsSFtDUYM9waCogw?s=sw&p=a&iam=2

Elke kilometer wat hy aflê, word gehardloop met ’n groter doel voor oë: om ’n stem te wees vir die diere wat nie self vir hulp kan vra nie.

Dirk se uitdaging herinner ons daaraan dat een persoon se bereidwilligheid om iets besonders te doen, ’n betekenisvolle verskil in die gemeenskap kan maak.