Inwoners in verskeie gebiedehet die afgelope twee maande onder kabeldiefstal gebuk gegaan.

Daar was veral ‘n tendens in wyk 5 en wyk 15, maar in September blyk daar om ‘n afname te wees in vergelyking met vorige maande.

Volgens een van die inwoners, Altus Snyman was daar in wyk 5 die laaste keer aan die einde van Augustus in Nieuwe- en OR Tambostrate ‘n voorval.

Dit beteken nie dat daar nie steeds kragkabeldiefstal in ander areas van die dorp plaasvind nie.

Daar is die afgelope paar weke kabeldiefstal in Goudstraat en Rivierstraat gerapporteer.

Volgens wyk 5 raadslid, Heinricha Hodgson, het sy al vrae rondom kabeldiefstal aan die munisipale bestuurder gerig, maar nog nie antwoorde ontvang nie.

Sy noem ook dat inwoners ure sonder krag is aangesien kabelvoorraad ‘n probleem is.

Die munisipaliteit het glo nog nie ‘n saak by die polisie rondom kabeldiefstal gerapporteer nie.

Volgens Hodgson is daar minstens 14 verskillende gevalle wat nie aan die polisie gerapporteer is nie.

* Die munisipaliteit het teen druktyd nie op die Herald se navrae gereageer nie.