‘n Video van die gru-ongeluk wat 21 Julie op die N12 naby Potchindustria plaasgevind het, is onlangs op sosiale media gedeel.

In die video kan gesien word hoe ‘n trok van baan verwissel. Die bakkie, wat betrokke was by die ongeluk, was reeds in daardie baan. Dit blyk die bakkie vir die trok uitgeswaai, oor die middelman gery en ‘n botsing van voor met ‘n aankomende taxi veroorsaak het.

Die trok het nie na die tyd op die ongelukstoneel gestop nie.

Brigadier Sabata Mokgwabone, polisiewoordvoerder, het bevestig 14 mense is ernstig tydens die ongeluk beseer en die insident word steeds ondersoek.

“Alhoewel die trok nie fisies by die ongeluk betrokke was nie, is die drywer geïdentifiseer en sal ‘n verklaring by die drywer geneem word.”

Kolonel Adéle Myburgh, polisiewoordvoerder, het vroeër aan die Herald gesê die Potchefstroom polisie ondersoek ‘n saak van strafbare manslag nadat een man dood en talle ander beseer is.

Die bestuurder van die bakkie, ‘n inwoner van Ikageng, is dood op die toneel verklaar. Talle ander insittendes van die taxi is tydens die ongeluk beseer en na ‘n plaaslike hospitaal vervoer. Van die insittendes moes uit die taxi gesny word.

Kyk na die video hier: