Feesvieringe het hierdie maand in die parkrun-gemeenskap plaasgevind. Eerstens het parkrun wêreldwyd hul mondigwording op 4 Oktober gevier. Dit is 21 jaar gelede dat die eerste parkrun in Londen se Bushy Park met 13 deelnemers plaasgevind het. Dit is begin deur Paul Sinton-Hewitt, wat ’n behoefte gesien het om hardloop en stap ’n leefstyl te maak wat gesondheid bevorder. Hy het die vereiste gestel dat dit vir almal toeganklik moet wees en, boonop, dat dit gratis moet wees. En so het sy droom ’n werklikheid geword wat nou wêreldwyd gevier word.

Tans vind parkruns in 22 lande plaas, en verlede week was daar 2 690 byeenkomste waarin 409 193 persone deelgeneem het. Hiervan het 19 122 vir die eerste keer aan ’n parkrun deelgeneem.

In Suid-Afrika het byna 220 dorpe gesien hoe 35 558 persone deelneem. Nog 3 173 was vrywillige helpers, en 2 072 het vir die eerste keer aan ’n parkrun deelgeneem. Paul het in Potchefstroom gematrikuleer by die Potchefstroom High School for Boys.

Op 11 Oktober het Kleinplaas parkrun sy 150ste byeenkoms gehou.

Die Kleinberg-uitdaging het beslis ‘n paar bene getoets, maar nie met desperaatheid nie – eerder met vasberadenheid. En elkeen van die deelnemers het dit oorwin, met ‘n bietjie sweet en baie glimlagte.

Hulle was verheug om 172 deelnemers by die viering te verwelkom. Onder hulle was 39 eerstekeerbesoekers – 12 wat hul eerste parkrun ooit voltooi het en 27 toeriste van ander geleenthede, insluitend een besoeker heelpad van Finland af.

Besoekende toeris Chris van der Vyver, het gepas in die 150ste plek geëindig tydens die 150ste geleentheid.

Alles het vlot verloop onder die sorg van 21 bekwame vrywilligers, wat trots hul hi-viz-baadjies gedra het – en selfs lekkers aan al die voltooiers uitgedeel het.

“’n Hartlike dankie aan almal wat tot die sukses van hierdie spesiale dag bygedra het. ‘n Baie spesiale woord van waardering gaan aan ons Geleentheidsdirekteure, Jimmy Verster en Hanlie Bothma, vir die bestuur van die geleentheid met toewyding en entoesiasme. En onthou: dis jou stap wat die praatwerk doen,” het Nick Jonas van Kleinplaas parkrun gesê.