Op slegs 12-jarige ouderdom staan Selmay Taylor gereed om Suid-Afrika met trots te verteenwoordig in Ringkontak-gevegte.  Sy gaan deelneem aan die komende Ringkontakgevegte en skopboks wêreldkampioenskappe as lid van die gesogte Presidensiële Span.

Dit is ’n besondere prestasie wat haar toewyding, talent en harde werk beklemtoon.

Dié kampioenskappe vind in April by Emerald Casino in Vanderbijlpark plaas.

Die keuringsproses vir die Presidensiële Span is streng en word slegs aan atlete toegeken wat op nasionale vlak uitblink en aan hoë standaarde voldoen. Selmay se insluiting in hierdie span plaas haar onder die beste jong atlete en gee haar die geleentheid om haar land op ’n internasionale verhoog te verteenwoordig.

Die jong sportster en leerder aan Laerskool Baillie Park, berei intens voor vir die kampioenskappe met gefokusde oefening, dissipline en ’n sterk dryfkrag om haar beste te lewer.

Sy ontvang ondersteuning van haar familie, haar afrigters by RCFA Elite, Mark Ekron en Veruschke Lubbe, asook die breër gemeenskap wat agter haar staan.

Selmay Taylor dien reeds as inspirasie vir jong atlete en bewys dat deursettingsvermoë, passie en harde werk groot deure kan oopmaak.