‘n Slaggat in Sol Plaatjiestraat 151 stel ‘n gevaar vir padgebruikers en inwoners wat al ‘n klomp maande die gat moet probeer vermy.

Hierdie gat hou die risiko in om moontlik in ‘n sinkgat te ontwikkel, veral met die hoeveelheid reënwater wat daarin inspoel.

Met die Potchefstroom Herald se besoek aan die toneel het een van die inwoners van die straat, Leon Joubert, met ‘n stok die diepte van die gat geïllustreer. Die teer het ook reeds so verbrokkel dat swaar druk maklik ‘n groter gat kan veroorsaak.

“Ek het hierdie gat al telkemale gerapporteer, maar die munisipaliteit kom nie om dit te herstel nie. Daar word genoem dat die spanne sal eers kom as die reën ophou,” vertel Joubert.

Heinricha Hodgson, DA-wyk 5-raadslid, sê die straat is ook baie nou, wat dit moeilik maak vir motoriste om die gat te vermy.

“Dit is baie gevaarlik en motoriste kan groot skade ly, veral in die aand wanneer die straatligte nie werk nie,” het sy verder gesê.

Die Potchefstroom Herald het die JB Marks Munisipaliteit op Donderdag, 23 April om kommentaar genader, maar het nog nie terugvoer ontvang nie.