Laerskool Mooirivier se leerders het onlangs weer gewys dat uitnemendheid nie net in prestasies gemeet word nie, maar ook in omgee, samewerking en gemeenskapsbetrokkenheid.

ATKV Redenaars

By die ATKV Redenaars-semifinaal het die skool se jong sprekers besonder goed gevaar. Noah Fouché (Graad 3) het ‘n plek in die nasionale finaal verseker, terwyl Paul Schutte (Graad 2) en Lisa Breed (Graad 7) onderskeidelik vierde en negende onder die top 10-sprekers in Noordwes geëindig het. Hierdie prestasies getuig van harde werk, deursettingsvermoë en die selfvertroue waarmee Tokkies elke geleentheid aanpak.

Tokkies besoek Vyfhoek Primary

Die skool se waardes was ook duidelik sigbaar tydens die hoofleiers se tweede kwartaal-uitreikaksie na Vyfhoek Primary. Danksy die vrygewigheid van die Mooirivier-gemeenskap is verskeie items ingesamel en geskenk om ’n positiewe verskil in ander leerders se skoolervaring te maak. Die aksie het opnuut bewys dat klein gebare van omgee ’n groot impak kan hê wanneer ’n gemeenskap saamstaan.

Bibberdag 2026

Intussen het Bibberdag 2026 die skoolterrein gevul met warmte, ondanks die winterkoue. Met warm mussies, serpe en pantoffels het Tokkies van alle ouderdomme saam pret gehad en terselfdertyd ’n belangrike les in spanwerk en samewerking geleer. Die dag het gewys hoe sterk ’n skoolgemeenskap kan wees wanneer almal saamwerk en mekaar ondersteun.