Die Potchefstroom-polisie ondersoek ‘n saak van strafbare manslag nadat ‘n man op sy fiets laat gistermiddag (Woensdag, 9 September) op die hoek van Govan Mbekilaan en Du Plooystraat doodgery is.

Die ongeluk het omstreeks 17:30 plaasgevind. Aangesien dit in ‘n besige deel van die stad gebeur het, het talle motoriste verby die toneel gery. Nooddienste en owerhede was vinnig op die toneel.

‘n Potchefstroomse inwoner, Franz Blume, sê hy was ‘n paar minute nadat die ongeluk gebeur verby die toneel. Hy het gesien wat gebeur het en toe besluit om motoriste oor die aard van die ongeluk te waarsku.

“Ek wou motoriste met kinders in die voertuig probeer waarsku dat die kinders nie sien wat ek gesien het nie. Die beelde daarvan is vasgebrand in my geestesoog,” noem hy.

Volgens die Noordwes-polisiewoordvoerder, kol. Adele Myburgh, het die 63-jarige man onder ‘n trok met twee sleepwaens beland. Die man is op die toneel dood verklaar.

Die polisie en ander owerhede was ‘n paar ure op die toneel, waar hulle die ongeluk ondersoek het. Motoriste moes alternatiewe roetes gebruik terwyl die ongelukstoneel nog afgespan was.