Die DA het dié naweek self moue opgerol en begin om slaggate in Goud- en Esselenstraat in Potchefstroom te herstel nadat inwoners glo al vir maande oor die toestand van die paaie kla.

Volgens André Klopper, DA-wyksraadslid vir Wyk 7, vorm die projek deel van die party se sogenaamde “slaggatmaand”-inisiatief. Hy sê slaggate word herhaaldelik by die munisipaliteit aangemeld, maar daar gebeur volgens hom min tot niks.

“Karre swaai uit vir die slaggate. Daar loop honderde studente te voet in hierdie gebied. Negentig persent van Potchefstroom se studente loop. Wat gebeur as ’n motor vir ’n slaggat uitswaai en ’n student tref?” vra Klopper.

Hy sê die projek kon afskop danksy hulp van Build it, wat die DA toegelaat het om fondse in te samel om die herstelwerk moontlik te maak.

Die groep beplan om die komende naweek voort te gaan met herstelwerk, met Silverstraat volgende op die lys.

Potchefstroom Herald het navraag aan die plaaslike munisipaliteit gerig, maar teen publikasietyd nog geen terugvoer ontvang nie.

Kyk na die video hier: