Solidariteit verwelkom Krieket SA (KSA) se verwerping van kwotas in sport, soos dit by monde van mnr. Thabang Moroe, die uitvoerende hoof van KSA, oorgedra is toe hy aangekondig het dat geen kwotateikens vir die Proteas in die komende Wêreldbekertoernooi gestel gaan word nie.

Hoewel KSA ʼn beleid het wat ʼn kwota van 55 persent vir swart spelers stel, het mnr. Moroe ongekwalifiseerd gestel: “Daar is geen teikens nie…ek wil hê dat die beste spelers gekies word sodat ons die Wêreldbekertoernooi kan wen.”

“Die posisie wat KSA inneem, is presies dit waarvoor Solidariteit staan en wat Solidariteit nastreef – ʼn sportomgewing wat gedepolitiseer is en waar spankeuses op grond van meriete geskied,” sê Werner Human, adjunkbestuurshoof van Solidariteit.

“In ʼn studie deur die Instituut vir Rasseverhoudings (IRR) is bevind dat die oorweldigende meerderheid van Suid-Afrikaners oor alle rassegroepe heen hewig gekant is teen sportkwotas. Die regering en sportowerhede staan alleen in die najaging van kwotas en die toenemende verpolitisering van sport,” het Human bygevoeg.

Solidariteit sal voortgaan om sportkwotas deur middel van beskikbare regsweë en openbare steun aan te vat.