Daar is ‘n tikkie déjà vu wanneer Hoër Volkskool se eerste krieketspan teen Hoërskool Rustenburg te staan kom. Die Noordwes o.19A Superliga finaal vind dié Saterdag by Volkies plaas.
Ongeveer ‘n jaar gelede het hierdie twee skole ook in die Noordwes eindstryd op dieselfde veld mekaar die stryd aangesê.
Daardie dag in 2018 het Volkies met vyf paaltjies die titel vir ‘n tweede keer in ‘n ry verower toe Christopher de Freitas die wenlopies met ‘n ses gemoker het.
Nou gaan De Freitas en kie weer probeer om die NW-titel vir ‘n derde agtereenvolgende keer te buit. De Freitas het in die seisoen aansienlik verbeter en die talent wat hy het, merkwaardig gebruik met puik beurte wat ‘n 200 teen Lichtenburg ingesluit het.
Van Zyl Smit met kolf en bal sowel as Niel Jansen van Vuuren met sy kolf, sal die tempo uit die staanspoor uit met hulle kolwe wil bepaal. Verwag dat een van hierdie spelers ten minste ‘n 50 sal moker.
Jannie Claassens se veelsydigheid met kolf en bal kan ook nie onderskat word nie.
In sy laaste NW-finaal sal hy sy stempel wil afdruk.
Rustenburg sal op hulle talentvolle kolwer Estiaan Schonfeldt, sowel as die draaier, Odirile Modimokane staat maak om die appelkar om te gooi.
Rustenburg kan vir ‘n verassing sorg, maar dan sal hulle op alle silinders moet vuur en seker maak dat Volkies se sterk kolforde nie momentum bou nie anders is dit ‘koebaai Meraai’ vir die Rustenburgers.
Die wedstryd begin om 09:00 op Volkies se A-veld (oorkant die hokkieveld).
