Elzette Fourie het vanaf 13 tot 19 Desember 2021 aan die Afrika Individuele Skole skaakkampioenskappe in Kenia deelgeneem. Sy het vyf van haar nege spelle gewen om ‘n sewende plek in die dogters o.17 afdeling in te palm.

“Dit was ‘n groot voorreg om Suid-Afrika te kon verteenwoordig en teen ander Afrika spelers te kon speel. Dit was ‘n lekker trotse gevoel om op die maat van Jerusalema by die afsluitingsfunksie in te loop,” noem Elzette.

Die Suid-Afrikaanse span het uit 40 lede bestaan en het 10 goue medaljes gewen. Dit was die land met die meeste goue medaljes, hoewel Kenia in totaal meer medaljes gewen het.

Die ander lande wat deelgeneem het was Uganda, Botswana, Malawi, Tanzanië, Zimbabwe en Ghana. Zambië en Egipte het weens Covid onttrek.