Gimmies se eerste seunshokkiespan is NWU Prestigereekswenners nadat hulle vir Hoërskool Zwartkop met 1-0 in die finaal op die NWU Astrobaan gistermiddag (Vrydag, 6 Mei) geklop het.

‘n Puik individuele doel in die eerste kwart van Jan-Adriaan van Wyk het die sege vir Gimmies beklink. Jan-Adriaan is wel later in die wedstryd beseer toe ‘n hokkiestok van ‘n Zwartkopspeler hom per ongeluk teen die kant van sy kop getref het.

Al is een van Gimmies se top spelers van die baan af, het hulle steeds kop gehou en konsekwente hokkie gespeel, al het Zwartkop druk toegepas in die laaste kwart.

Krediet moet ook aan Gimmies se verdediging en veral doelwagter, Wian Landman gegee word. Hy het ‘n paar keer vir Zwartkop gefnuik wat ‘n goeie voorbeeld van die span se aanhouer-wen mentaliteit was hulle teenstanders in ‘n taai eindstryd uit te hou.

Foto’s: Wouter Pienaar