Op ‘n koue wintersoggend was die Potchefstromer en getroue parkrun deelnemer, Ivy Dercksen (68) gereed om haar 100ste parkrun by die Kleinplaas parkrun te voltooi.

Haar hart was warm vir hierdie wedloop op Saterdag, 24 Junie en sy het sommer voor sy haar oë kon uitvee die 5km in slegs 32 minute kafgedraf om haar 100ste parkrun op ‘n hoogtepunte te voltooi.

Wat haar prestasie nog meer merkwaardig maak is dat sy al 100 parkruns in Potch (Trimpark en nou Kleinplaas) voltooi het en ook relatief laat in haar lewe begin het – beslis ‘n bewys dat ouerdom net ‘n nommer is.

“Ek was so opgewonde om uiteindelik by 100 uit te kom. Weens die Covid-19 pandemie, moes ek nou effens langer wag. Almal by Kleinplaas parkrun het my behoorlik op die hande gedra met my 100ste een. Dit was vir my baie spesiaal,” vertel Ivy.

Sy vertel ook dat sy in die Covid-19 pandemie steeds 5km sessies ingewerk het om fiks te bly met die wete dat sy weer as die tyd reg is aan parkruns kon deelneem.

“Dit laat my goed voel en ek geniet dit. Dit hou baie gesondheidsvoordele in,” vertel Ivy wat se parkrun rekord 29 minute is.

Ivy het eers in haar 60’s aan parkrun begin deelneem nadat haar dogter haar na een geleentheid gebring het – dit res is geskiedenis.

“Ek kyk nou om by 150 parkruns uit te kom!,” vertel Ivy opgewonde.