Adelay Botha en Lelanie Martens van Laerskool Baillie Park is gekies om Noordwes tydens die All Ages-netbaltoernooi in Pretoria vanaf 29 Junie – 2 Julie te verteenwoordig.

Dié insluiting is die beloning vir hul harde werk, toewyding en deursettingsvermoë gedurende die netbalseisoen.

Lelanie het ook die besondere eer ontvang om as kaptein van die Noordwes 0/12-span aangewys te word. Haar leierskap, sportmanskap en voorbeeld op en van die baan af maak haar ’n waardige keuse vir dié verantwoordelikheid.

Laerskool Baillie Park wens die twee spelers alle sterkte toe vir die toernooi en vertrou dat hulle die skool en Noordwes met trots en onderskeiding sal verteenwoordig.

“Adelay en Lelanie se prestasie is nie net ’n persoonlike hoogtepunt nie, maar ook ’n trotse oomblik vir hul afrigters, spanmaats, ouers en die hele Baillies-gemeenskap,” noem die skool.