Toe Potchefstroom Gimnasium se o15A-krieketspan net 36 lopies nodig gehad het met nog vyf paaltjies in die sak, was Victor Scheepers (26) en Jaco Marais (23) goed op dreef om Volkies se telling van 105 te haal.

Dit was voordat Mofenyi Olaniran op die toneel verskyn het en vyf paaltjies vir slegs vyf lopies in 4.4 boulbeurte geneem het om sy span na ’n 13-lopie-oorwinning te lei. Gimmies is almal vir 92 lopies uitgeboul.

Olaniran, wat tans ’n Graad 8-leerder aan Saints Christian School is en vir Volkies as deel van ’n krieketbeursooreenkoms speel, het in sy eerste Volkie-Gimmie-ligawedstryd die wedstryd met sy wegbreekballe omgedraai.

Hy het Marais en Scheepers se paaltjies geneem voordat hy ook van Dian de Bruyn, Adriaan Kruger en Rikus le Roux ontslae geraak het. Le Roux is been voor paaltjie betrap om Volkies se oorwinning te verseker.

Toe die skeidsregter se vinger opgaan, was die Volkievreugde groot – veral omdat 105 lopies nie ’n groot telling in ’n 50-beurtwedstryd is nie.

Janu de Beer (3/33) was ook uitstekend in die eerste beurt toe hy drie paaltjies laat kantel het. Gimmies se topkolwers, Juvan Botes, Casey Lues en Christoff Raubenheimer, is almal uit met die telling op 6/3.

Dit het vir Volkies hoop gegee, maar hulle moes steeds skouer aan die wiel sit toe Gimmies begin terugveg.

Botes was vroeër ook uitstekend met die bal vir Gimmies en het 5/21 in sy 10 boulbeurte geneem – ’n vertoning wat op enige ander dag heel moontlik die wedstryd kon wen. Adriaan Kruger (4/28) was ook skitterend.

Jean Liebenberg se 29 was die meeste wat Volkies se kolwers met die kolf kon bydra.