Die NWU Eagles het hul posisie in die top twee van die Varsity Netbaltoernooi gehou nadat hul gister (Sondag, 13 September) vir Wits met 60-48 geklop het.

Die NWU moes hard veg gedurende die wedstryd met die telling wat teen rustyd net 27-22 was in die Potchefstromers se guns. Die NWU het uiteindelik in die laaste 15 minute na ‘n hoër rat oorgeskakel om Wits relatief gemaklik te klop.

Die verdedigende kampioene sal nou in die laaste poelwedstryd vanmiddag (Maandag, 14 September) teen Maties te staan kom. Maties is nie in die beste vorm vanjaar nie en die NWU behoort nog ‘n oorwinning in die sak te steek. Soos sake tans staan lyk dit of die NWU teen Kovsies of Tukkies in die half-eindstryd komende Maandag (21 September) sal speel. Dit hang als af hoe vanmiddag se laaste poelwedstryde eindig.