Ferdies se boogskietspan het hul uitstekend van hul taak gekwyt tydens die AGA-SA Nasionale Boogskietkompetisie, wat op 1 en 2 Oktober in Jeffreysbaai plaasgevind het.
Ferdies se 3D-span, bestaande uit Gerhard Maritz, David Knoetze, Elné Jacobs, Divan van der Walt, Celise Pretorius en Diané Grobler, het algeheel vierde uit 38 spanne geëindig.
Hierdie groep boogskuts was vasberade om op die podium te staan en hul het dit reggekry in individuele kompetisie.
Gerhard Maritz het tweede onder die hoërskoolseuns en derde algeheel in die 2D-formaat geëindig.
In die Bullseye-formaat het Diané Grobler derde onder die Graad 8-meisies behaal, terwyl Elné Jacobs eerste onder die Graad 10-meisies en derde onder hoërskoolmeisies geëindig het. Divan van der Walt het ‘n derde plek onder die Graad 10-seuns behaal.
Divan het ook twee perfekte tellings van 50 in Bullseye en een in 3D aangeteken. Diané en Carla Alberts het elk ‘n perfekte telling van 50 in Bullseye behaal.
