POLOKWANE – Vroeg voorverlede Vrydag-oggend is al die kleuters van Osieteddies Kleinkindontwikkelingsentrum in busse na boer Willie Human van Human Boerdery se plaas. Hier het hulle geleer van koeie melk en die rustigheid van die plaaslewe ervaar. “Dit is so stil en rustig hier,” vertel Jennifer Olivier grootoog terwyl sy rondkyk.
Die kleuters is in vyf groepe verdeel en in die melkkamer ingeneem waar Boer Human en sy werkers die vyf koeie met masjiene gemelk het. Grootoog en vol afwagting het die kleuters gekyk waar melk vandaan kom.
Na die toer van die melkkamer het hulle geleentheid gehad om van die vars melk te drink, party van die kleuters was eers onwillig om te proe, maar kon later nie genoeg kry nie. “Dis lekker soet,” vertel Annabel Kemp met ‘n melksnor nadat sy haar eerste slukkie melk gedrink het.
Die kleuters is na die opwinding van die uitstappie na Boer Human se lowergrasperk waar hulle heerlik aan worsrolletjies gesmul het en met sy hondjie gespeel het.
