Trots SA is Oosskool se gr. R’e

Suid-Afrika is 'n land met 'n groot diversiteit kulture woonagtig in die land. Van boere met jaggewere tot Zoeloes met luiperdvelle, enige iets is moontlik by 'n geleentheid waar verskillende kulture saamkom.

June 23, 2015

Maretha Swanepoel 1 minute read

Danelle Buitendag en Hennie Beukes stel 'n boere-egpaar op die plaas.

POLOKWANE – Suid-Afrika is ‘n land met ‘n groot diversiteit kulture woonagtig in die land. Van boere met jaggewere tot Zoeloes met luiperdvelle, enige iets is moontlik by ‘n geleentheid waar verskillende kulture saamkom.

Dit was die geval toe Laerskool Pietersburg-Oos (Oosskool) se gr. R-groep ‘n Trots Suid-Afrika-dag gehou het op Vrydag, 12 Junie.

Die kinders het vroeg reeds hul ouers opgewonde wakker gemaak sodat hulle die dag kan begin.

Elke leerder het aangetrek soos iemand wat trots Suid-Afrikaans is. Daar was Voortrekkers en jagters, boere en boeremeisies, Zoeloes, Vendas en selfs ‘Patricia Lewis’ het ‘n draai gemaak.

Elke klas se ouers was ook verantwoordelik vir ‘n eg Suid-Afrikaanse gereg en boeresport.

Die leerders het gesmul aan pannekoek en koeksisters en gekyk hoe word wors gestop en biltong gemaak.

Hulle kon ook ervaar hoe dit voel om pap met die hand te eet.

Vir ontspanning kon hulle bokdrolletjies spoeg, sakresies hou en driebeen-hardloop waarna hulle kon afkoel met heerlike gemmerbier.

“Die tema vir die week was Trots Suid-Afrikaans en ons het die leerders geleentheid gegee om te wys waaroor hulle trots is,” vertel Marietjie Wilkinson, gr. R -juffrou.