So, praat saam in Afrikaans
In 'n land met 11 amptelike tale kan kennis van jou medelandgenote se tale help met nasiebou
POLOKWANE – In ‘n land met 11 amptelike tale kan kennis van jou medelandgenote se tale help met nasiebou.
In die lig hiervan het die leerders van die Noordelike Moslem Skool vanaf gr. 4 tot 8 Vrydagaand aan ‘n Afrikaanse redenaarskompetisie by die skool deelgeneem.
Die seremonie het begin met leerders wie toesprake oor verskillende onderwerpe moes lewer. Die gr. 4’s het gepraat oor: Koerante: Positief of negatief, die gr. 5-leerders oor My wêreld van kommunikasie, gr. 6-leerders se toesprake het gegaan oor ‘n Goeie boek wat ek gelees het, gr. 7 oor Om ‘n wenner te wees en die gr. 8-leerders se onderwerp was Ek sou kon doen met ‘n miljoen of meer.
Die organiseerder en Afrikaanse onderwyseres van die skool, Freda Niemann, sê sy was baie beïndruk met die leerders, “Ek is baie trots op hulle. Die leerders het hulle baie goed van hulle taak gekwyt.”
In gr. 4 het Mahdia Modan die beste toespraak gelewer, Safia Khan Patel was tweede en Humeyrah Alli derde.
Die gr. 5-leerders se toppresteerders was Humayra Eren, Asma Khan en Muhammad Omar Gani, terwyl Muhammed Moti, Raeesa Bava en Ilhaam Jacob in gr. 6 die eerste drie plekke ingeneem het.
Die drie gr. 7-leerders wie bekroon is, was Aqsa Batavia, Nazmira Kader en Waseema Chickte en die leerders in gr. 8 wie uitgeblink het was Mohamed Moola, Fatima Aziz Ismail en Ridiyyah Hoosen.
Die wenners in die verskillende kategorieë het trofeë, medaljes en sertifikate na afloop van die redenaarskompetisie ontvang.
