Duan de Waal trap dat die speke so sing
Duan de Waal se droom is om aan die International XCO World Championships in Switserland deel te neem.
POLOKWANE – Duan de Waal, vandag ‘n gr. 11-leerder aan Hoërskool Pietersburg, het sy eerste XCO-bergfietswedren as gr. 3-leerder by Oosskool meegemaak en spog nou met ‘n tweede plek in die Skole XCO-reeks wat oor vier wedrenne strek.
“My vriend Hanro Ehlers het my destyds omgepraat om saam met hom te begin fietsry. Ek onthou die eerste XCO-resies by Hoërskool Merensky; ek het feitlik niks van die sport geweet nie en was baie onfiks,” vertel Duan.
In 2022 het hy vir die eerste keer Limpopokleure vir fietsry ontvang, en sedert Desember 2024 het hy ekstra hard begin oefen om meer mededingend te wees in vanjaar se kompetisies.
“Die jaar het baie goed begin en ek is baie dankbaar vir my drie tweede plekke in die Skole XCO-reeks. Ek het ook deelgeneem aan die 2025 Limpopo XCO’s, waar ek na vier wedrenne die algehele wenner was, en in die marathon/XCM-reeks is ek tans derde.”
Duan neem deel in die juniormansafdeling, wat o/17- en o/18’s insluit.
Hy sê die kompetisie is taai: “Jy moet altyd jou beste gee, en soms ook ‘n bietjie geluk aan jou kant hê.”
Sy familie ry ook fiets en is sy grootste ondersteuners.
“Hulle help my deur moeilike tye en motiveer my voor groot wedrenne. My oefenprogram word deur my pa, wat ook my afrigter en borg is, opgestel. Ek probeer tussen agt en 11 ure per week oefen, en volg ‘n gesonde dieet. Ons werk die program weekliks uit volgens die wedrenne wat voorlê. Gelukkig het ons ‘n binneshuise oefentoestel, wat dit maklik maak om vinnig ‘n uur of twee by die huis te oefen voordat ek moet leer of huiswerk doen.”
Duan sê sy grootste uitdaging is motivering.
“As jy nie gemotiveerd bly nie, mis jy oefeninge en sukkel om dit weer op te vang. Ek vra myself gereeld af: wat sou Nino Schurter of Alan Hatherly gedoen het as hulle nie lus was vir oefen nie? Fietsry moet lekker wees. Jy moet daarvan hou, hard werk en nooit opgee nie. Elke wedren gee net een kans – doen dit voluit.”
Duan se droom is om aan die International XCO World Championships in Switserland deel te neem. “As dit nie sou werk nie, is my volgende mikpunt om aan die Cape Epic saam met my ‘stage race buddy’ Ethan Stewart deel te neem.”
