HPP se rugbyspanne deur na finaal

MOKOPANE – DRIE van Hoërskool Piet Potgieter se rugbyspanne gaan vanjaar in die Limpopo finaal speel en kwalifiseer ook vir die uitspeelwedstryde vir die gesogte Beeld-trofee later vanjaar.

Die trotse ouers van die eerstespan het Bosveld gekontak met die goeie nuus dat die eerstes, sowel as die o/14- en o/15-spanne verlede Saterdag op Hoërskool Ben Viljoen se velde op Groblersdal hul semi-finaal wedstryde vir mediumskole gewen het. Die eerstespan het teen Hoërskool Louis Trichard gespeel en in ‘n tawwe wedstryd met 31 – 21 geseëvier.

Die o/15’s het teen die Hansies kragte gemeet en 15 – 3 gewen. Die o/14-rugbyspan het met 38 – 14 teen Hoërskool Louis Trichardt se jongelinge koning gekraai. Baie geluk aan die drie spogspanne wat deurdring na die Limpopo-finaal op 25 Julie by Hoërskool Tom Naudé in Polokwane.