New York wink vir dansers
Altesaam nege van Z's Dance Studio se dansers gaan Suid-Afrika volgende jaar tydens die American Dance Awards Internasionale Kampioenskappe in New York verteenwoordig.
MOKOPANE – Altesaam nege van Z’s Dance Studio se dansers gaan Suid-Afrika volgende jaar tydens die American Dance Awards Internasionale Kampioenskappe in New York verteenwoordig.
Die dansers het onlangs hulle danspassies in Pretoria tydens die American Dance Awards South African Regional Championships gewys en ‘n plek in die internasionale kampioenskappe losgedans. Hulle het aan verskeie items, van hip hop, disco, moderne danse, solo, duet, trio en groepdans afdelings deelgeneem.
Om ‘n silwer toekenning te verower moet dansers ‘n gemiddeld van tussen 80% en 84% behaal en vir ‘n High Silver toekenning moet jy ‘n gemiddeld tussen 85% en 89% verwerf. Lara Forssman het twee silwer en een High Silver toekennings ontvang, terwyl Monique Smit met drie silwer en een High Silver toekennings spog.
Germari Steyn en Nicolene Smit het elk twee silwer toekennings losgedans. Juanita Bekker palm ‘n silwer en twee High Silver toekennings in en Marissa Kleynhans verwerf twee silwer en een High Silver toekennings. Theressa Oosthuizen behaal ‘n silwer en twee High Silver toekennings en Micke Theron spog met ‘n High Silver toekenning.
Loren Fortune raap twee silwer en een High Silver toekennings op. “Ek is baie trots op elkeen van hierdie dansers, hulle pluk beslis die vrugte van hulle harde werk,” sê hul trotse afrigter, Zané de Wet.
